يا بلدنا يا حلوة (4) (مهندس/ صلاح أبو الليل)

Eng. Mohamed

22 مارس 2021

(0)

يا بلدنا يا حلوة (4) الشوارع ... حواديت(3)

بقلم مهندس/ صلاح أبو الليل

مهندس معماري

و باحث في مجال الفنون و التراث و الهوية المصرية

المره اللي فاتت اتكلمنا عن بعض الكلمات في اسماء الشوارع و المناطق ... فيها ذكر لوجود المياه ..زي مثلا غمرة ... اسمها غمرة علشان كانت منطقة بتغمرها المياه .. و شارع الترعه البلاقيه في شبرا .. كان ترعه و لسه بنفس الاسم لحد دلوقتي .. ترعة الزمر لسه موجود اجزاء منها .. هي و ترعة المنصورية و ترعة المريوطيه و دول اللي صورهم بتبان جنب الاهرامات في الصور القديمه ... و كل اللي بيشوف ميه جنب الاهرامات يبقي مش مصدق ... هو ايه اللي جاب القلعه جنب البحر J

اسم بولاق يقال انه .. تحريف من البو لايك .. البحيرة الجميله .. و لكن في احتماليه ايضا ان تكون محرفه من البيلاق و هي كلمة قديمه معناها المرسي .. حيث كانت منطقة بولاق الحاليه مرسي للسفن ... بولاق ابو العلا .. نسبة الي الشيخ الصالح حسين ابي علي .. المعروف بابو العلا و كان شيخا صالحا و قطبا صوفيا .. عرفه الناس باسم السلطان ابو العلا .. سلطان ايه ؟؟ سلطان الصوفيين ... و كان ليه زاويه للخلوة و التعبد في المكان المبني فيه المسجد حاليا .. الكلام ده كان في القرن الخمستاشر الميلادي ..

و من حب الناس للشيخ ابو العلا سمو الكوبري الحديد اللي انشاه عباس حلمي التاني باسمه .. كوبري ابو العلا .. و لان في مصر بولاقان .. واحد منهم بولاق ابو العلا .. فالتاني بولاق الدكرور نسبة الي الشيخ ابو محمد يوسف بن عبد الله الدكروري .. و الذي عرف بالتقوي و الخير و سكن هناك ...

نرجع تاني لموضوعنا و نتكلم عن احد اشهر مناطق وسط البلد ...

منطقة الازبكية ... نسبة الي ازبك باشا ... اللي عمر البحيرة ( اللي كانت مكان ميدان العتبه حاليا ) و اتعرفت المنطقة باسم الازبكيه و كانت منطقة في غاية الجمال .. كان فيها سراية محمد بك الالفي ( اللي في شارع باسمه في وسط البلد عند شارع عماد الدين ) .. السرايا دي اللي احتلها نابليون بونابرت و اللي تربص في جنينتها سليمان الحلبي لكليبر و قتله .. البحيرة دي اهملت و اتردمت بعد كده و مكانها دلوقتي حديقة الازبكيه اللي كانت بتغني فيها احيانا ام كلثوم في حفلها الشهير في الخميس الاول من كل شهر ... دي كانت بركة الازبكية .. طب ايه حكاية بركة الفيل ؟؟

دي كانت بركة قديمة و موجوده من قبل دخول الاسلام لمصر و كانت مساحتها كبيره جدا حوالي 40 فدان فضلت تتردم شويه بشويه لحد ما اختفت و مبقاش منها غير الاسم .. اسمها .. بركة الفيل .. في اقاويل حول ان في شخص مشهور كان اسمه الفيل ساكن في المنطقة .. بس الاكثر تاكيدا انها اتسمت كده لان خمارويه ابن احمد ابن طولون كان مغرم بتربية الحيوانات .. و جاب مجموعه من الفيله عملهم بيت علي حافة البحيرة .. و كانت الناس بتخرج و تتفسح حوالين البركة و تتفرج علي الفيله و هي بتستحمي في البركة .. فسموها " بركة الفيل " و دي في منطقة الحلمية دلوقتي .. بس زي ما قولنا اسم بس J

علي كده بقي القاهره زمان كانت كلها برك و مستنقعات و مجاري مائيه .. ايوه ده حقيقي .. عارفين امستردام في هولندا ؟؟ ...اهو القاهره في الوقت ده كانت شبه امستردام .. ممرات ميه و شوارع و بيوت .. بس مش بجمال و نظافة امستردام يعني .. بس برضه كانت جميله و ليها روح و سحر بيخلو الناس تجيها من كل حته.

الدرب الاحمر ... الدرب يعني الطريق او الشارع .. طب ليه احمر ؟؟ .. ده علشان الدم اللي سال فيه و كان بحور بسبب قتل العثمانيون لمناصري طومانباي المملوكي .. اتقدر عدد القتلي بنحو عشر تلاف قتيل .. يعني الدم كان للركب J .. و طبعا لما اتمسك طومانباي اتعمل معاه الجلاشة J ... اتقتل و اتعلقت راسه علي باب زويلة لمده تلات تيام .. زي ما كلنا عارفين .. بالمناسبة زويله اللي علي اسمها الباب دي ... قبيلة من البربر ساكنو في شمال افريقيا ساعدو الفاطميين علي دخول مصر .. فاطلقوا اسم القبيله علي الباب تخليدا و شكرا لهم ... في كلام عن ان سبب تسمية الدرب الاحمر بالاسم ده كان بسبب كثرة المباني اللي كانت من الطوب الاحمر فيه و دي كانت مادة مستحدثة لان اغلب المباني كانت في الوقت ده من الحجر .. و ده السبب الارجح J

علي ذكر القبيلة اللي كان اسمها زويله .. في اسماء لشوارع كتير .. بتحمل اسماء شخصيات .. بس احنا مش عارفين دول مين ؟؟ .. اكيد طبعا مش بنتكلم عن سعد زغلول و لا طه حسين و لا مصطفي كامل مثلا .. لا بنتكلم عن الشيخ ريحان مثلا .. مين الشيخ ريحان ؟؟؟

شارع الشيخ ريحان ... واحد من اشهر شوارع التحرير .. اما بقي الشيخ ريحان ف ده اغلب الظن انه الصحابي ابو ريحانه .. مولي رسول الله .. و الذي جاء مع عمرو بن العاص في فتح مصر و مات و دفن في ضريحه الكائن في الشارع .. و لكن تدور اقاويل حول انه شخص اخر و اسمه فعلا الشيخ ريحان و هو من نسل الامام الحسين ... بالقرب من نهاية الشارع .. شارع الشيخ ريحان ناحية نهر النيل يقع ميدان سيمون بوليفار احد ابرز رموز النضال من اجل الحرية في امريكا اللاتينيه .. علشان كده اتسمي الشارع اللي بيصب فيه الميدان باسم امريكا اللاتينيه .. ده بعد ما كان باسم قصر الدوبارة .. نسبة للقصر بتاع امينة بنت الهامي ابن عباس حلمي الاول اللي اتجوزت الخديو توفيق .. و و هي برضه ام الخديو عباس حلمي التاني .. و دي كانت من ضمن الامراء و الاميرات اللي اتعملهم الفرح الاسطوري بتاع حي المنيرة اللي هنتكلم عنه قريب .

علي ذكر الصحابي ابو ريحانه ... كان في صحابي اسمه ابو قتاده الانصاري .. جه لمصر في زمن عمرو بن العاص .. و مات و ادفن في احد ضواحي الجيزة .. اللي سموها الناس باسمه .. و لكن تسهيلا بدل ما يتقال " ابو قتادة " .. بقي ابو اتاته J

جهاركس الخليلي ... الامير اللي بنا خان ( يعني مكان) للتجارة اتعرف لحد دلوقتي باسم خان الخليلي .. مكان الخان كان تربة مدفون فيها امراء و حكام الفاطميين .. و مش بس دول .. ده مدفون فيها اجدادهم اللي ماتو قبل ما يدخل الفاطميين لمصر .. طب ازاي ؟؟ ... اصل الفاطميين لما جم لمصر جابوا معاهم رفات اجدادهم يدفنوها هنا ... اصل مصر دي كانت حلم و مطمع لكل الناس .. املا يعني J .. علشان كده كانت التربه المعزيه .. اللي بتضم رفات احفاد المعز ..

الخان برضه كان مكانه جزء من القصر الشرقي ... اصله كان في قصرين كبار و في منتهي الفخامه في المنطقة دي .. القصر الشرقي و القصر الغربي ... و بين القصرين يقع الشارع اللي اسمه بين القصرين ... ده الشارع اللي دارت فيه احداث قصة نجيب محفوظ الشهيرة .

من الاسماء الشهيرة جدا للشوارع و اللي يتحمل اسم شخصيات بس مش معروفه اوي .. شارع كلوت بيك .. و ده اسم لطبيب فرنسي مشهور كان اسمه انطوان كلوت .. و ده جابه محمد علي علشان ينهض بالطب في مصر .. الراجل العظيم ده مش كان بيعالج الناس و بس .. لأ ده جاب اطباء فرنسيين علشان يعالجو الناس و يعلموا الطب كمان .. و بدأ بميت طبيب شاب علمهم الطب .. خمسين ينتشروا في ارجاء مصر يعالجو .. و خمسين يعلموا ميه تانيين اللي اتعلموه .. و علشان يحسن و يزود المعلومات كان بيجيب اطباء فرنسيين يدو محاضرات للطلبه الجدد .. بيعدها عليهم الاطباء اللي اكبر منهم .. و هكذا يعني الدكتور الفرنساوي يدي المحاضره و الدكتور المصري " يعيد " وراه .. و من هنا جت كلمة ... معيد J

نرجع لكلوت بيك اللي الخديو اسماعيل حب يخلد اسمه و سمي شارع من اهم الشوارع المتفرعه من الالازبكيه و بتوصل للفجالة ... ( الفجالة اللي كانت زمان غيطان زراعة للفجل ... و من هنا اشتق الاسم J ) .. نرجع لكلوت بيك اللي الشارع بتاعه سكن فيه اجانب كتير و اشتهر بالفنادق الرخيصه و البارات و الشقق اللي بتتاجر للاجانب .. و بعدها تحول الشارع لاحد اهم المناطق المرخص فيها بالدعارة .. ايام ما كان مسموح بممارسة الدعارة و لكن تحت شروط و بشكل رسمي ... كلوت بيه اللي حارب الدعارة لانها احد اهم اسباب انتشار الامراض .. الشارع اللي باسمه بقي احد معاقل الدعارة .. عجبت لك يا زمن J

و للحديث بقيه .. مع حواديت شوارعنا