يا بلدنا يا حلوة (2) (مهندس/ صلاح أبو الليل)

Eng. Mohamed

25 يناير 2021

(0)

يا بلدنا يا حلوة (2) الشوارع ... حواديت(1)

بقلم مهندس/ صلاح أبو الليل

مهندس معماري

و باحث في مجال الفنون و التراث و الهوية المصرية

الشوارع ... دي كل حياتنا ..

طبعا مقصدش الزحمة اللي احنا عايشين فيها علي طول دي و اللي مخليانا مقضين حياتنا و وقتنا تقريبا في الشارع ... انا قصدي ان الشارع ده جزء من حياتنا و انشطتنا اليوميه .. لأ لأ .. مش عشان الناس بترمي فيه الزبالة و بتعاكس و تتحرش فيه بالبنات و بكل خلق الله اللي ماشيين في امان الله .. لأ .. بس الشارع ده .. السوق .. القهوة .. التمشية ساعة عصريه ... البيوت اللي كلها حواديت و اسرار ... و علي فكرة بقي .. الشوارع برضه وراها حواديت و ليها اسرار ... تعالو النهارده نحكي عن الشيئ المهم في حياتنا .. الغائب الحاضر .. العنصر الحيوي المهم .. اللي فاكرين اننا نقدر عليه ... و هو سبب تعبنا .. نتكلم عن .... الشارع .. و مش اي شارع ... الشارع المصري

طب هو كل ممر بيعدي بين بيوت يبقي شارع ؟؟ ... الحقيقة ان الطرق و الممرات درجات و مقامات .. زي البني ادميين كده ... يعني الصغير بيبقي اسمه " زنقة " و ده اسم قديم للشارع الصغير اللي عرضه مبيزدش عن مترين و بيكون غالبا مشاة بس و اخره سد .. و العربيات صعب تدخله .. بتفتح عليه مداخل البيوت .. و بيبقي متفرع من اللي اكبر منه .. اللي هوه الزقاق ... و زي ما قولنا ده اسم قديم .. ده حتي منتشر في بلاد شمال افريقيا كلها .. يعني المغاربه و التوانسه عندهم زنقات .. و طبعا الراحل معمر القذافي قال الموضوع ده في احدي خطاباته و اللي كانت ظريفه جدا .. لما قال " زنقه .. زنقه " J ... و مننساش طبعا اشهر زنقات مصر .. زنقة الستات .. موطن ريا و سكينة الاصلي J

طب اللي اكبر من الزنقه يبقي ايه ؟؟ .. يبقي الزقاق ... علي طول جت في دماغنا .. زقاق المدق .. قصة اديب نوبل ... المصري الجميل .. نجيب محفوظ .. الزقاق بقي اكبرشويه ... يعني عرض اربعه متر مثلا ... و ده بيصب بدوره في الحارة .

الحارة .. التكوين الجميل .. رمز التجمع بين الاسر .. و لان الناس كانت دايما بتختار الجار قبل الدار .. فغالبا الحارة بيكون بين سكانها في دايما رباط خفي .. او معلن .. بتربطهم حاجه .. مهنه مثلا زي حارة المزينين .. او جنسية .. زي حارة الشوام و حارة المغاربه ... او هويه ... زي حارة الروم .. او ديانه .. زي حارة اليهود الشهيره طبعا .. و الحقيقة ان الحارة بتمثل مجتمع خاص .. و زمان كان لكل حارة باب .. " باب الحارة " اللي السكان بيقفلوه عليهم بليل علشان محدش غريب يكون وسطهم .. ده حتي الحاره بيكون دايما فيها حد كبير .. الكل بيحترمه .. ده بقي شيخ الحارة .. اللي عارف كل الناس و كل حاجه عن الناس اللي في حارته .. و لحد دلوقتي في شيوخ حارة .. بترجع ليهم الدولة للاستفسار عن حد ساكن عندهم ... ده حتي المناطق بتتقسم الي شياخات .. متسمعش عن كلمة شياخة الروم او شياخة المغربلين ... اهو الشياخة مشتقه من شيخ الحارة .... وده حتي في كلامنا اليومي لما حد يقعد يقول معلومات كتير .. نقوله " هتعملنا فيها شيخ حاره يعني ؟؟ " J

طب الزنقات و الازقة و الحواري ... بيصبوا فين ؟؟

بيصبوا في ضيفنا النهارده ... الشارع J

الشارع المصري اللي بيطور كل يوم مع احتياجاتنا و زحمتنا .. و اللي بقي في منه الكبير اللي بيسموه طريق ... زي طريق العروبه او طريق صلاح سالم او طريق الاوتوستراد ... و في منه الكبير اوي اللي بيسموه محور ... زي محور ال na بتاع التجمع اللي هو محور المشير حاليا ... او زي طريق المحور .. طبعا المحاور دي بتبقي طرق سريعه و مفيش عليها بيوت .

نرجع لصاحبنا .. الشارع ... الجاني و المجني عليه في نفس ذات الوقت .. شوارعنا اللي بتحمل اسماء غريبه زي بركة الرطل .. الخرنفش .. الشهبانو .... او بتحمل اسماء اشخاص .. بس هم مين اصلا ؟؟؟ ... يعني عمرك سألت نفسك .. هو مين البطل احمد عبد العزيز ؟؟ .. و ليه بطل ؟؟ ... طب مين الرئيس عبد السلام عارف ؟؟ .. و رئيس ايه ؟؟ هو اهنا حكمنا حد اسمه كده ؟؟

اولا .. تعالوا نتعرف علي قصص ظريفة ورا اسماء مناطق شهيرة ... زي مثلا ... العجوزة ... العجوزة .. تبقي نازلي هانم ... بنت سيلمان باشا الفرنساوي ... مؤسس الجيش المصري الحديث فعهد محمد علي باشا ... سليمان باشا ده في ميدان باسمه في وسط البلد ... اللي بعد الثورة بتاعت 52 اعتبر من رموز العهد البائد .. فلول يعني .. فغيروا اسم الميدان الي ميدان طلعت حرب و اتشال تمثاله و اتحط مكانه تمثال طلعت حرب .. بس لسه في محل عصير هناك اسمه جنه فواكه سليمان باشا .. شاهده علي الاسم القديم ... طب نرجع لنازلي .. نازلي اللي اتجوزت محمد شريف باشا .. مؤسس الدستور المصري و الملقب بابو الدستور ...و اللي متسمي علي اسمه شارع شريف اللي في وسط البلد .... اثمرت هذه الزيجه ( زيجة شريف و نازلي ) عن " توفيقة " اللي اتجوزت عبد الرحيم باشا صبري اللي كان وزير زراعه زمان .. و في شارع باسمه في العجوزة ... توفيقة و عبد الرحيم .. انجبوا نازلي و نوال ... نرجع للعجوزة J

العجوزة دي تبقي نازلي الكبيره زي ما قولنا و كان جوزها شريف باشا بيملك 30 فدان من طرح النيل في المنطقة المعروفه حاليا بالعجوزة ... مات شريف و كان بيحلم انه يبني جامع في ارضه ... كملت نازلي المشوار و حققتله حلمه بعد ما مات و بنت جامع اشرفت بنفسها علي بناه ... كان عندها في الوقت ده حوالي 90 سنه .. علشان كده الناس سمت الجامع .. جامع العجوزة ... و بعد كده ... اتسمت المنطقة كلها بالعجوزة J

طب و نوال ؟؟ .. زي ما قولنا .. نوال تبقي بنت توفيقه هانم شريف و عبد الرحيم باشا صبري .. و اخت نازلي ... نازلي صبري مرات الملك فؤاد .. و ام الملك فاروق ... بس نوال اللي هي خالة فاروق دي ماتت و هي عندها ست سنين .. و من حزنهم عليها سموا القصر بتاعهم باسمها ... سرايا نوال .. اللي هي دلوقتي مقر اكاديمية ناصر للعلوم العسكرية .. و للسبب ده سموا الشارع ... شارع نوال J

طب في منطقة كامله اسمها المنيرة ... ده علشان منيرة المهدية مثلا ؟؟

لأ .. بص يا سيدي .. المنيرة حاليا .. هي المنطقة اللي قريبه من التحرير .. اللي فيها المركز الثقافي الفرنسي و جنب باب اللوق اوي .. المنطقة دي موقعها متوسط بين الحي الراقي جاردن سيتي .. و المنطقة الشعبية " السيدة زينب " ... المنطقة دي شهدت احتفالات سنه 1873 .. بمناسبة زواج ثلاث امراء من ابناء الخديو اسماعيل .. و اميرة ابنته ايضا ... اربع عيال مره واحده J .. الافراح دي استمرت الزينه معلقه و الاضواء منوره لمدة اربعين يوم ... المنطقة كانت منيره ... فاتسمت " المنيرة " .. J