"بعض الحيل المستخدمة للنصب على المهندس"
أصدقائى وزملائى وزميلاتى من المهندسين المهتمين بالأعمال المدنيه والمعمارية و المتابعين لإصدارات
"مجلة المهندس " الشهرية يسعدنى ان التقى بكم مجدداً من خلال الأصدارالثامن عشرللسنة الثانية من إصدارات
المجله
يسعدنى ان التقى بكم مجدداً وبعد أن تم الإنتهاء من تناول المقالات الخمس السابقة عن موضوع " الاخشاب " من كل جوانبه .
أسمحوا لى خلال
هذا العدد أن أبعد قليلا عن الملفات الهندسيه الشيقة والممتعة و أتناول قضية هامة
تخص عدد كبير من الزملاء المهندسين والزميلات المهندسات الا وهى البحث عن وظيفة فى
ظل تخرج الأعداد الكبيرة خلال السنوات القليله الماضية وقد وجدنا أن نقابة
المهندسين المصرية وهى الجهه الوحيده المخوله لإصدار شهادات ممارسة مهنه الهندسة
بكل تخصصاتها بمصرنا الحبيبه ونجد انها قد فتحت الباب على مصرعيه لجميع الجامعات والمعاهد
الخاصة التى تدرس الهندسة بصفه عامة للإلتحاق بالنقابه والحصول على لقب "
مهندس " وهنا نجدن المشكلة أن الأعداد الكبيرة من الخرجين وبعض الزملاء الذين
فقدوا عملهم يبحثون عن عمل وبعد الحصول على الشهادة والقيام بالتسجيل كمهندس نقابى
نجد ان السوق المفتوح دون اى ضوابط يعج بالشركات والمكاتب الهندسية المحترمة ذات
السمعة الطيبه وكذلك نجد العكس وقد زادت "حيل النصب على المهندسين للحصول على وظيفة " .
ارجوا من الجميع القراءه الجيده ومن ثم
اخذ الحيطة والحذر اثناء البحث عن وظيفة لأنه ممكن يغنيك عن كتير من المشاكل التي ممكن
ان يقعوا فيها عند البحث عن وظيفة والنصح الموجز كالتالى :-
·
لاتدفع أي أموال من أجل تعبئة طلب وظيفة لأي شركة أو مكتب.
·
لاتوقع على أي شرط جزائي مهما كان .
·
لاتذهب لأي مقابلات أىاً كانت و معك
اللاب توب الخاص بك .
·
لا تعمل أبداً بدون مقابل .
·
لاتدفع أي مبالغ نقدية مقابل الوظيفة
لاى فرد مقابل توفير فرصة عمل أو تسهيل السفر للعمل بالخارج.
·
لا تشرع فى بدء العمل لأى مكتب أو شركة
إلا بعد التعيين وإستلام العمل.
·
لا تستكمل مصوغات تعينك لأى شركة إلا
بعد صدور قرار استلام العمل.
·
لاتوقع على طلب إستقالة مسبقة.
·
لا تعطى اوراقك لاى مقاول او شركة
للتأمين عليك وانت لاتعمل معهم فعليا .
· لا تصدر شهادات إشراف لمشروعات او أعمال لا تعمل بها فعلياً .
وإليكم بعض التفاصيل التى واجهت بعض الزملاء والتى أتمنى أن لا يقع فيها الكثير منا .
§
أبليكيشن
اللي
بيحصل إنك بتقدم على شغل في شركة و يتحدد معاك ميعاد إنترفيو، تروح في ميعادك يطلبوا
منك تملى أبليكيشن قبل ماتدخل الإنترفيو، بس الأبليكيشن ليه رسوم بسيطة 20 جنية مثلاً،
تدفع الرسوم و تعمل إنترفيو و تروح، و طبعاً محدش هيكلمك لأن دي شركة وهمية مأجره مقر
مؤقت و بتستغل بطالة الشباب في جني الملايين من خلال رسوم الأبليكيشن.
§
المقابلة
هتجيلك
مكالمة جميلة إنك قبلت في شركة بعرض خيالي وراتب كبير و كل الظروف اللي بتحلم بيها،
و مطلوب منك في أسرع وقت تروح مقابلة و معاك اللاب توب بتاعك و مبلغ معين عشان هتخلص
شوية إجراءات خاصة بالتعيين أو السفر زي الكشف الطبي و خلافه، حضرتك تروح المقابلة
يقابلك مندوب من الشركة ياخدك تعمل الكشف الطبي في إحدى المراكز الطبية و تضطر تسيب
معاه شنطة اللاب توب بتاعتك.. تخرج ماتلاقيهوش و تتصل بيه الموبايل غير متاح.
§
السماسرة
باختصار..
إن حد يقنعك إنك تدفع مبلغ مالي عشان يسفرك، في أغلب الحالات هتدفع مبلغ كبير للحصول
على فرصة سفر ممكن تكون وهمية ، و كتير من اللي سافروا بهذه الطريقة دي اكتشفوا بعد
السفر إنهم اتنصب عليهم.
§
الشغل
شركة
تكلمك تروح تعمل مقابلة، يسلمك لوحات مبنى و يطلب منك إنك تعمل تصميم أو حصر كميات
للبنود أو أي Task تانية خلال أسبوع مثلاً و تسلم
شغلك، و بناءاً عليه هيتم تقييمك، طبعاً إنت بتجتهد قدر استطاعتك و تسهر ليل نهار عشان
تخلص الـ Task اللي طلبوها منك و في اعتقادك
إن هيتم تقييمك عليها، ولكن للأسف دي مجرد اشتغاله وانت في كل الأحوال مش هتقبل وانت
كدة عملتلهم شغل ببلاش و هيشوفوا غيرك كل مايتزنقوا في شغلانه.
§
الإختبار وفترة العمل بدون
مقابل
عملت
إنترفيو و قبلت في الشغل و لكن بلغوك إنك تشتغل معاهم فترة إختبار تتراوح مابين شهرين
إلى 3 شهور بدون مقابل، عشان يقدروا يقيموا مستواك و يقنعوك إنك في الفترة دي إنت بتتعلم
و الشركة مش بتستفيد منك، وبعد الـ3 شهور كل اللي بتتمناه هيتحقق، طبعاً دي من ضمن
طرق النصب و بعد الـ3 شهور هيمشوك ويجيبوا غيرك يعملوا معاه نفس الحركة وهكذا.
§
الاوراق الخاصة
إن شركة
تطلب منك إنك تسلمها مسوغات التعيين الخاصة بيك (شهاداتك و صورة بطاقتك و كارنية النقابة…
إلخ) قبل مايتعمل لك إنترفيو أو قبل ماتتقبل في الشركة أصلاً، وده مش صح.. المفروض
إن الأوراق الخاصة بتعيينك بالشركة بتقدمها فعلاً و لكن بعد الإنترفيو و بعد مايتم
قبولك و تتفقوا على كل التفاصيل و في مرحلة التعاقد.
§
الشرط الجزائي
بعد
مايتم قبولك في الإنترفيو.. و عند توقيع العقد مع الشركة تكتشف وجود بند في العقد عبارة
عن شرط جزائي يمنعك من إنك تسيب الشغل قبل فترة محددة ولتكن سنتين مثلاً، و يكون في
شرط جزائي مبلغ مالي كبير في حالة إخلالك بالبند.
§
إستقالة مسبقة
عند
توقيعك على عقد العمل موظف الـ HR
يطلب منك توقع على إستقالة بدون تاريخ، ولو حاولت تستفسر منه عن السبب
هيقنعك إن ده مجرد إجراء روتيني بيتم إتخاذه مع كل الموظفين الجدد و إن ده نظام الشركة،
وفي الغالب إنت هتوقع.
الموضوع
ببساطة إن بعض الشركات بتعمل كدة عشان تقدر تفصل الموظف في أي وقت بدون مايطالب بحقوقه..
لأن حقوق الموظف بتختلف على حسب هو المستقيل من الشركة أم الشركة هي اللي استغنت عنه.
§
إستمارة 6
أثناء
توقيع العقد موظف الـ HR
يطلب منك توقع على إستمارة خاصة بالتأمينات اسمها س 6 ، وانت في الغالب
هتوقع لأنك مش هتكون عارف دي عبارة عن إيه، إستمارة س 6 هي الإستمارة الخاصة بفصل الموظف
من التأمينات، بعض الشركات بتطلب من الموظفين الجدد إنهم يوقعوا على إستمارة 6 بالإضاافة
للتوقيع على استقاله مسبقه، بحيث إن الشركة تقدر تستغنى عن الموظف في أي وقت بدون مايعمل
شوشرة أو يطالب بأي حقوق ليه.
§
التأمين
المقاول
يطلب منك صورة بطاقتك و صورة كارنية النقابة بدون ماتكون شغال معاه عشان يأمن عليك
و يقدر يشيل شغل باسمك أو يسجل نفسه في إتحاد مقاولي التشييد و البناء، وفي المقابل
هيدفعلك مبلغ مالي و هيقنعك إن ده إجراء روتيني مؤقت مش هيضرك في شيء أو إنه هيفصلك
من التأمينات بعدها لو عاوز المهم انه يسجل فى الاتحاد ان لديه مهندس نقابى مؤمن
عليه .
فى نهاية هذا المقال اتمنى من الله عز وجل أن أكون قد نقلت لكم بعض
الصور المتداوله فى سوق العمل الهندسي ، رجاء من حضراتكم التكرم بتوصيلها للزملاء
وخاصة الخريجين الجدد الباحثيين عن عمل فى السوق الهندسي لعلها تكون مفيده لهم .
حكمة المقال
" ليس القوي من يكسب الحرب دائماً وإنما الضعيف من يخسر السلام ....."
إعلانات جمهور وأسرة المجلة من هنا
فضلا ، قوموا بنشر المقال على وسائل التواصل الإجتماعى، فقد يكون شخصاً فى حاجة إليه
وإن كان لديكم أى إستفسار حول أى مما ورد فى المقال، لا تترددوا فى ترك تعليق بأسفل المقال، وأسرة الموقع سوف تقوم بالرد عليكم فى أسرع وقت إن شاء الله
إعداد وتقديم
مهندس/ أشرف عبد العليم
تعليقات
إرسال تعليق