يا بلدنا يا حلوة (3) الشوارع ... حواديت(2)
اتكلمنا المره اللي فاتت عن الفرق بين
الزنقه .. و الزقاق ..و الحارة .. و الشارع .. و الطريق ... و المحور ... في كمان مفردات تانيه .. زي السكه و الدرب و العطفه ..
طب
الدرب ؟؟ الدرب هو شارع بس طويل و غالبا بيوصل بين شوارع تجاريه و سكنيه .. يعني
بيجمع الشوارع و فيه مساحات للجلوس و البيع و المقاهي .. و بيكون بعيد عن المناطق السكنيه
.. زي الدرب الاحمر .. درب المهابيل .. درب الهوي اللي اتعمل فيلم باسمه في
ثمانينيات القرن الماضي
طب و
السكه ؟؟ .. السكه يعني " الطريق
المؤدي الي " .. يعني سكة القلعة من عنوانها تعرف انك لما تمشي فيه توصل
القلعه .. علشان كده اتعودنا نقول لما نحب نطرق حد بلطافه ... سكة السلامه J ... و الطريق اللي فيه
خسارة .. اسمه سكة الندامه يعني بيوصل للندم J
نرجع تاني لموضوع الحواديت .. الحواديت اللي
ورا تسمية الشوارع .. حكينا المره اللي فاتت عن نوال .. و العجوزة ... و المنيرة
... هنتكلم المره دي عن شوارع تانيه .. و موضوع غريب يخص تسمية الشوارع ... حد
لاحظ اسماء بعض الشوارع القديمة .. سواء اللي اتغير اسمه او لسه بنفس الاسم القديم
.. يعني مثلا عندنا حته اسمها فم الخليج .. و شارع قديم اسمه الخليج المصري .. ( بقي
دلوقتي شارع بورسعيد ) .. في كمان غمرة ...
و في بركة الفيل ..و في مجري العيون ( اللي جاري تطويرها حاليا لتصبح منطقة سياحية
عالمية ) ..و في قنطرة الدكه ...و في باب
البحر .. ايه كل المايه دي !!! J
طب نبتدي منين ؟؟ من فم الخليج .. و دي
المنطقة اللي في مدخل المنيل عند معهد السكر اللي ع الكورنيش قريب من مستشفي القصر
العيني .. المنطقة دي كان فيها مبني مازالت اطلاله باقيه لحد دلوقتي .. مهمته انه
يرفع المايه و يصبها في مجري مائي بيوصل الميه للقلعه .. اللي هو مجري العيون ..
عيون الماء يعني .. و بعد ما توصل الميه للقلعة بتتخزن في ابيار ( زي بير يوسف كده
) و يتاخد منها الميه اللي بتغذي القلعة .. قلعة الجبل زي ما كلنا عارفين .. اللي
كانت زي قصر ضيافه يشوف منها الضيوف صورة للقاهره كلها من اعلي نقطه فيها .. و
كانت مقر الحكم ايام محمد علي باشا و لحد ما اسماعيل نقل المقر لقصر عابدين .. طب معلش سؤال .. ليه اسمها قلعة الجبل ..
ايوه علشان ع الجبل ده مفهوم .. بس ليه قلعة الجبل .. مش القلعة و بس ؟؟ .. ده
علشان هي مكنتش القلعة الكبيرة الوحيده .. كان في قلعة البحر .. و دي مكان قصر المنسترلي
حاليا في جزيرة الروضه يعني .. دي قلعة كانت سكن للحرس الجمهوري ايام الدولة
الايوبيه .. سكن للمماليك .. مماليك الصالح نجم الدين ايوب جوز شجرة الدر .. او
بمعني ادق هي اللي كانت مراته .. و مسكت الحكم من بعده .. نرجع للقلعة .. قلعة
البحر اللي كانت مقر مماليك اخر حكام دولة الايوبين في مصر .. و اللي لسه الميدان
المشهور هناك في المنيل اسمه .. ميدان المماليك .. علي فكرة قطز و قايتباي و ايبك و اقطاي ..
كانوا من مماليك الزمن ده .
الخليج المصري ... الخليج المصري ده كان بيمشي في شارع بورسعيد قريب من السيده زينب
و بيعدي علي بركة اسمها بركة الفيل عند منطقة الحلمية .. اللي كانت سكن علية القوم
زمان .. و مسلسل ليالي الحلميه كان بيبين جزء من الموضوع ده و سرايات الحلميه ... و
الحلمية اتسمت كده نسبة الي الخديو عباس
حلمي الثاني اللي كان ليه قصر هناك اسمه سرايا الحلمية ..نرجع للخليج المصري ... الخليج ده .. كان جزء منه بيروح للقلعة عن طريق
مجري العيون و الجزء التاني بيروح في جولة داخل القاهره القديمه .. جولة طولها
حوالي 46 كم ... ياااه ... طبعا ما هو ده كان بيمر من السيده و يروح باب الشعريه و
يوصل الظاهر و الوايلي .. و يعدي للمطريه و عين شمس .. و منها للخصوص و سرياقوس و
ابو زعبل .. بطول 46 كم زي ما قولنا و بعدين يكمل الي الاسماعيليه .. من خلال ترعة
الاسماعيلية اللي لسه موجوده لحد دلوقتي .. و يصب في بحيرة التمساح و بعدين يروح
للسويس و يصب في البحر هناك ... رحلة طويله و غريبة .. اصل المجري المائي ده ..
كان بيستعمل في سقاية الغيطان هناك .. لما المناطق دي كان كلها زراعات .. ده لحد
الخمسينات كانت عين شمس منطقة ارياف و زراعات و منتجع بيهرب الناس ليه من زحمة
القاهره
كان في برضه مجموعة ترع و مسارات مايه صغيره
في وسط البلد برضه .. كان في قنطره في شارع عدلي حاليا .. بتعدي الناس للبر التاني
عند مول طلعت حرب .. اصل شارع عدلي كان ترعه و بتصب في شارع طلعت حرب .. و ترعة
شارع طلعت حرب بتصب في خليج كبير كان مكان شارع رمسيس .. ده حتي كان في مبني ( لسه
موجود لحد دلوقتي ) في اول شارع الجمهوريه ورا جامع الفتح .. المبني ده كان اسمه
المكس .. و دي جايه من المكوس .. يعني الضرايب .. المبني ده كان مخصص لتحصيل
الضرايب من المراكب اللي معديه ... معديه فين ؟؟؟ في ميدان رمسيس J
الخليج بتاع ميدان رمسيس ده كان اسمه الخليج
الناصري .. و ده نسبة الي الناصر محمد بن قلاوون .. ده كان بيتفرع من الخليج
المصري عند جاردن سيتي و يوصل من خلال وسط البلد و بحيرة الازبكيه لرمسيس و يصب في
النيل هناك عند بولاق .. ( فاكرين فيلم صراع في الوادي ؟؟ كانت منطقة بولاق فيها
مينا ) .. طب حد عارف معني بولاق دي ايه ؟؟ .. دي مشتقة من كلمة (بولايك ) يعني
البحيرة الجميلة بالفرنساوي ... و مش دي بس التسمية الوحيده اللي اتسربت لينا من
الفرنساويين ايام الحملة .. لا ده في كمان " الموسكي " .. و دي مشتقه من
كلمة .. موسك الفرنسية اللي معناها المسجد .. تضاربت الاقوال هل تمت التسميه بسبب
امر قائد الجيش الفرنسي بالهجوم علي المسجد .. فقالهم " ا لا موسك " ..
و لا المنطقة كانت كلها مساجد فتسمت لي موسك .. و في روايه تانيه خالص عن ان الارض
دي كانت لعز الدين ابن موسك .. ابن خال صلاح الدين الايوبي .. بس ده مش مرجح ..
ليه ؟؟ لان المقريزي اللي عاش بعد عصر الايوبيين و قبل الحملة الفرنسية مقلش كلمة
الموسكي دي في وصفه .. فيرجح انها اسم في عهد الحملة الفرنسية.
ازبك باشا ... عمر البحيرة اللي كانت مكان
ميدان العتبه حاليا و اتعرفت المنطقة باسم الازبكيه و كانت منطقة في غاية الجمال
.. كان فيها سراية محمد بك الالفي ( اللي في شارع باسمه في وسط البلد عند شارع
عماد الدين ) .. السرايا دي اللي احتلها نابليون بونابرت و اللي تربص في جنينتها
سليمان الحلبي لكليبر و قتله .. البحيرة دي اهملت و اتردمت بعد كده و مكانها دلوقتي
حديقة الازبكيه اللي كانت بتغني فيها ساعات ام كلثوم في الخميس الاول من كل شهر
دي
كانت بركة الازبكية .. طب ايه حكاية بركة الفيل ؟؟
دي كانت بركة قديمة و موجوده من قبل دخول
الاسلام لمصر و كانت مساحتها كبيره جدا حوالي 40 فدان فضلت تتردم شويه بشويه لحد
ما اختفت و مبقاش منها غير الاسم .. اسمها .. بركة الفيل .. في اقاويل حول ان في
شخص مشهور كان اسمه الفيل ساكن في المنطقة .. بس الاكثر تاكيدا انها اتسمت كده لان
خمارويه ابن احمد ابن طولون كان مغرم بتربية الحيوانات .. و جاب مجموعه من الفيله
عملهم بيت علي حافة البحيرة .. و كانت الناس بتخرج و تتفسح حوالين البركة و تتفرج
علي الفيله و هي بتستحمي في البركة .. فسموها " بركة الفيل " و دي في
منطقة الحلمية دلوقتي .. بس زي ما قولنا اسم بس J
علي كده بقي القاهره زمان كانت كلها برك و
مستنقعات و مجاري مائيه .. ايوه ده حقيقي .. عارفين امستردام في هولندا ؟؟
...اهو القاهره في الوقت ده كانت شبه
امستردام .. ممرات ميه و شوارع و بيوت .. بس مش بجمال و نظافة امستردام يعني .. بس
برضه كانت جميله و ليها روح و سحر بيخلو الناس تجيها من كل حته.
الدرب الاحمر ... الدرب يعني الطريق او
الشارع .. طب ليه احمر ؟؟ .. ده علشان الدم اللي سال فيه و كان بحور بسبب قتل
العثمانيون لمناصري طومانباي المملوكي .. اتقدر عدد القتلي بنحو عشر تلاف قتيل ..
يعني الدم كان للركب J .. و طبعا لما اتمسك
طومانباي اتعمل معاه الجلاشة J ... اتقتل و اتعلقت راسه علي باب زويلة لمده تلات
تيام .. زي ما كلنا عارفين .. بالمناسبة زويله اللي علي اسمها الباب دي ... قبيلة من البربر ساكنو في شمال افريقيا
ساعدو الفاطميين علي دخول مصر .. فاطلقوا اسم القبيله علي الباب تخليدا و شكرا لهم
.
في قصة تانية ان الدم كان من قتل المماليك في
مذبحة القلعة اللي عملها محمد علي ... بس في كلام تاني ان المنطقة كان اسمها الدرب
الاحمر من قبل كده و ده لانتشار المباني اللي كانت من الطوب الاحمر في المنطقة دي
.. و الحكايات حوالين المنطقة دي كتير و كلها مثيرة و غامضة
الشيخ ريحان ... من اشهر شوارع التحرير .. طب
مين الشيخ ريحان ده ؟؟ .. اغلب الظن انه الصحابي ابو ريحانه .. مولي رسول الله ..
و الذي جاء مع عمرو بن العاص في فتح مصر و مات و دفن في ضريحه الكائن في الشارع ..
و لكن تدور اقاويل حول انه شخص اخر و اسمه فعلا الشيخ ريحان و هو من نسل الامام
الحسين ... بالقرب من نهاية شارع الشيخ ريحان ناحية نهر النيل يقع ميدان سيمون
بوليفار احد ابرز رموز النضال من اجل الحرية في امريكا اللاتينيه .. علشان كده
اتسمي الشارع اللي بيصب في الميدان باسم امريكا اللاتينيه .. ده بعد ما كان باسم
قصر الدوبارة .. نسبة للقصر بتاع امينة
بنت الهامي ابن عباس حلمي الاول اللي اتجوزت الخديو توفيق .. و ام الخديو عباس
حلمي التاني .. و دي كانت من ضمن الامراء و الاميرات اللي اتعملهم الفرح الاسطوري
بتاع حي المنيرة .
جهاركس الخليلي ... الامير اللي بنا خان يعني
مكان للتجارة اتعرف لحد دلوقتي باسم خان الخليلي .. مكان الخان كان تربة مدفون
فيها امراء و حكام الفاطميين .. و مش بس دول .. ده مدفون فيها اجدادهم اللي ماتو
قبل ما يدخل الفاطميين لمصر .. طب ازاي ؟؟ ... اصل الفاطميين لما جم لمصر جابوا
معاهم رفات اجدادهم يدفنوها هنا ... اصل مصر دي كانت حلم و مطمع لكل الناس .. املا
يعني .. علشان كده كانت التربه المعزيه .. اللي بتضم رفات احفاد المعز ..
الخان برضه كان مكانه جزء من القصر الشرقي ...
اصله كان في قصرين كبار و في منتهي الفخامه في المنطقة دي .. القصر الشرقي و القصر
الغربي ... و بين القصرين يقع الشارع اللي اسمه بين القصرين ... ده الشارع اللي دارت فيه احداث قصة نجيب
محفوظ الشهيرة
حكاية القصرين و الابواب اللي حوالين القصرين
و اسماء بعض الشوارع في المنطقة ... هو موضوع حلقتنا اللي جايه
و الي لقاء قريب نستكمل فيه حواديت شوارعنا
 الشوارع ... حواديت(2) بقلم مهندس/ صلاح أبو الليل مهندس معماري و باحث في مجال الفنون و الترا…){kind=link}
تعليقات
إرسال تعليق