الفرق بين الحب و التعلق
هل فى فرق بين الحب والتعلق اصلا ولا هما الإثنين واحد ولا نتيجة مترتبة على بعض؟
الحقيقة بقى ان الحب حاجة والتعلق حاجة ثانية ،يمكن مفيش تعلق من غير ما يبدء بحب، لكن ما بيستمرش كحب، مش فاهمين حاجة !!!
طيب خلينا نتكلم عن التعلق بشكل أكثر تفصيل وبمثال بنشوفه كثير حوالينا، الحموات الفاتنات، بتبقى بتحب ابنها أو بنتها بس الحب دة بيتقلب لتعلق زائد، فبتبقى مش قادرة تتخيل سعادته أو سعادتها مش من خلالها أو فى وجودها أو فى حيز تانى بعيد عنها.
فبتتحول العلاقة ساعتها لعلاقة مؤذية وهى مش واخدة بالها، أو مثال تانى علشان الأمهات الكرام ما يزعلوش مننا، الزوجة بعد الزواج أو الزوج بعد الزواج فى أغلب الحالات بيتحول الحب لتعلق، فبتبقى الزوجة شايفها زوجها محور حياتها وده بيخليها تتهمه بالاهمال وعدم الاهتمام.
لو حست انه بيبقى سعيد مثلا فى قاعدة صحابه أو فى هواية بتأخد جزء من وقته وبرده الزوج بيبقى شايف إن مراته حق امتلاك وأنها خلاص بقت بتاعته زى اللعبة الى اشتراها وبيتحكم فيها وامتى تبقى سعيدة وامتى يسمحلها تبقى حزينة كل دى أمثلة للتعلق مش حب.
الحب إنى أحب أشوف الشخص إلى بحبه سعيد وراضى حتى لو كان سعادته دى بعيدة عنى أو خارج حيزى ومدارى الى بدور فيه في فيلم مشهور اسمه la la land ،
البطله ما كنتش بتحب نوع الموسيقى إلى بيعزفها حبيبها وبمعنى اخر مش ذوقها فى الموسيقى، لكن لما حست أنه بدء يتخلى عن موسيقاه إلى بيحبها وبيستمتع بيها وحارب علشانها كتير، من أجل انهم يفضلوا مع بعض ويوفرلها سبل الحياة،
هى إلى وقفتله و حطت علاقتهم على المحك لأنها شعرت أنه تخلى عن الشئ إلى بيحبه وبيسعده (حتى لو كانت مابتحبش الشئ ده) هيفقده جزء من روحه إلى هى حبتها زى ما هى كده، هو ده المعنى الى عايزة أوصله،
حبوا بعضكم برفق وسيب كل طرف يتنفس و يعيش ويستمتع فى وجودك أو فى غير وجودك صدقونى كده هيتمسك بحبك أكتر مش هتفقده ولا حاجة.
فى النهاية راجع نفسك وخليك واعى لنفسك فى علاقتك مع إلى حواليك هل ده حب ولا تعلق.
إعداد وتقديم
تعليقات
إرسال تعليق