الفن الاول
مقدمة
زمان و احنا صغيرين كان في برنامج اسمه " الفن السابع " و كان في جريدة فنية ثقافية بنفس الاسم .. و كانت بتتكلم عن السينما العالمية في العموم والمصرية اكثر وبتخصص اكبر .. الكلام ده كان في زمن ما قبل الانترنت .. زمن كان كل نافذتنا علي العالم هو التيلفزيون والجرايد اليومية والمجلات والدوريات سواء المصرية او الاجنبية ...
كنا بننتظر البرامج دي او المجلات علشان نبص علي العالم الخارجي و نعرف الدنيا بره شكلها ايه .. و كان دايما في بالي سؤال بيطاردني .. لما السينما هي الفن السابع ... امال باقي الفنون اللي قبلها فين ؟ .. و هل في فن ثامن و تاسع ؟؟
لحد ما دخلت كلية الهندسة و عديت من اعدادي باعجوبة ... و في اول محاضرة تعريفية بالقسم اللي دخلته .. كان السؤال اللي طالما انتظرت اجابته ... ايه هم الفنون الاخري و ترتيبها ؟؟
اختلف النقاد و الفنانين علي مر العصور في ترتيب و عدد الفنون ... بس الأرجح أن الفنون سبعة .. زي ايام الاسبوع السبعة .. زي نغمات الموسيقي السبعة .. زي الوان الطيف ماهم سبعة .. و زي السماوات السبعة ... رقم سبعة كان و مازال يحمل العديد من الاسرار سواء الفنية او الكونية ...
ولو مشينا مع الراي السائد هنجد ان الفنون السبعة بترتيبهم هم ... العمارة ( الفن الاول ) و يليها النحت ( الفن الثاني ) ... تليها في المركز الثالث .. الفنون البصرية سواء الفنون التشكيلية او التصويرية ... ثم الفن الرابع (الموسيقي ) ... ثم الفن الخامس ( المؤلفات ) من شعر و نثر و نصوص ادبية قصصية .. و في المركز قبل الاخير ( السادس ) ياتي المسرح المعروف بـ "ابو الفنون " .. و يشمل ايضا الرقص الايقاعي و الاداء الحركي ... و في المركز السابع و الاخير تأتي السينما.
ده اشهر تصنيف و ترتيب للفنون ... و السبب في تسمية المسرح بابو الفنون .. ده لانه بيشمل كل الفنون و يحتويهم في عمل واحد .. يعني اي مسرحية بيكون فيها ديكور يعني عمارة .. و بيستخدم فيها النحت في تكوين المشاهد و خدمة الديكور .. و طبعا وجود للفن التشكيلي والمؤثرات البصرية والالوان والاضاءة والازياء .. كذلك المسرحية بتكون مبنية علي نص و سيناريو .. و الاداء الحركي و التمثيلي هو الجزء الاكبر من العرض .. كذلك الاداء و الاخراج السينمائي و لكن في شكل مسرحي ذو شمول اكبر ... كل هذه العناصر مجتمعة تشكل المسرحية من سينوغرافيا و اداء و نص و اخراج ... علشان كده المسرح ابو الفنون .
نرجع لموضوعنا الاساسي .. العمارة .. الفن الاول ... سواء في ترتيب الفنون او في النشأة .. فالعمارة كانت بداية تكوين المأوي للانسان القديم و احدي اهم متطلباته زيها زي المأكل والملبس ..
علشان كده العمارة ولدت مع الانسان منذ نزوله الي الارض و كانت وسيلته للتعمير و البناء المجتمعي ... و فضلت تتطور و تاخد قالب و شكل حياة كل حقبة عاشها الانسان علي سطح الارض .. فعمارة الانسان الاول في الكهوف تختلف عن عمارته في حضاراته القديمة سواء في بابل او بلاد ما وراء النهر .. او الحضارة المصرية القديمة ... و تاخذ العمارة من قوة الحضارة ونهضتها او من عصور اضمحلالها .. سواء في العصر الاغريقي ... الروماني .. القبطي .. الاسلامي باختلاف حقبه .. الطولونية .. الفاطمية .. الايوبية .. المملوكية .. العثمانية .. العصر الحديث.
و دايما بنلاحظ ارتباط كل الفنون ببعضها في كل مرحلة زمنية ... و ده اللي هنستعرضه في المقالات القادمة و اللي اخترتلها اسم ... " يا بلدنا يا حلوة " .. لانها مش بس هتستعرض جمال العمارة في بلدنا .. لا وكمان علاقتها بباقي الفنون السبعة و اتصالهم في الشكل والمضمون ...
والي لقاء قادم باذن الله
تعليقات
إرسال تعليق