🌹الدنيا حق انتفاع وبس !!!!!!!!!...🌹

(بقلم) أ.د.وفاء محمد محمد مصطفى

استاذ هيدرولوجيا النظائر البيئية و دراسة مواقع محطات نووية

هيئة الرقابة النووية و الاشعاعية

Wafaasalem21@yahoo.com

🌹الدنيا حق انتفاع وبس !!!!!!!!!...🌹

من جميل ما قرأت : هي دي الدنيا متلخصة في كلمتين أنها بكل اللي فيها حق انتفاع ..

مفيش حد يملك فيها أي حاجة ..

معاك ورق ملكية لكل حاجة عندك ، صح ؟ .. شقتك ، أرضك ، عربيتك ، حسابك في البنك ، وغيره و غيره ..

لكن تعالَ نفكر :

نفس الشقة اللي انت فيها بأسمك أو كانت بأسم والدك ، وبعد كام سنة (ربنا يطول في عمرك) راح تبقى بأسم حد من ولادك ، صح ..!!

يبقى أنت كنت عايش فيها حق انتفاع وبس ، لغاية ما تخلص رسالتك وبعدين تسيبها للي بعدك .. زي ما سابهالك اللي قبلك ..

والدنيا كلها بتلف كده على الكل ..

الغريب أننا نتشاجر ونكره ويمكن نقتل بعض على أشياء ربنا مسلفها لنا نقضي بيها كام يوم وبس ..!

مفيش ملكية حقيقية في الدنيا ، مجرد ملكية وهمية ..

زي غرفة الفندق تبقى بتاعتك يومين الإيجار ، وبعدين ترجع لأصحابها أو كرسي الطيارة / القطار / التاكسي ، يبقى بتاعك كام ساعة لغاية لما الرحلة تخلص .. وييجى اللي بعدك ياخده !!

لو فهمت كده هتعمل حاجات كتير حلوة ..

هتنبسط باللي عندك وتعمل بيه حاجات حلوة تفرح بيها مع كل حبايبك ..

اقتصد وحوّش بحكمة ، لكن أوعى تبخل على نفسك وعلى اللي معاك ..

كمان هتبطل تتخانق وتضيع وقتك على حاجات تتحل بشوية تفاهم ..

اخسر فلوس بس ما تخسرش راحة بالك ، واوعى تضيع عمرك على حاجات هي في الآخر مش ملكك ..

ابسط اللي حواليك وخليهم يفرحوا .. قال رسول الله صلى الله عليه وسلم «أحب الأعمال إلى الله عز وجل سرور تدخله على مسلم».

افتكر أن كتير من اللي حوشناه ، يا رميناه ، يا نسينا انه عندنا ، يا تلف وعت وباظ من الركنة

كده هتفرق وتكتر من خيرك علشان قلبك يعيش مرتاح ..

((( الخلاصة )))..

افتكر ان الدنيا حق انتفاع !!!

اللي عندك استفيد منه وفيد به الناس على قد ما تقدر ....

لذلك يقول صلى الله عليه وسلم :
يقولُ العبدُ : مالي مالي ، وإِنَّ من مالِهِ ثلاثًا : ما أكل فأفْنَى ، أو لبِسَ فأبْلَى ، أو أعْطَى فأقْنَى ، وما سِوَى ذلِكَ ، فهو ذاهِبٌ وتارِكُهُ للناسِ

فلا تبخل ولا تُسرف ووازن الأمور ولا تنسى من حولك !

فالعطاء فقط هو ما يستمر معك في الحياة الأخرى .

ولا حزن يدوم ولا ســرور

ولا بؤس عليك ولا رخــــــاء

إذا ما كنت ذا قلب قنــوع .. فأنت ومالك الدنيا ســــــواء

اللهم ارزقنا القناعة والرضا بما قسمت لنا في الدنيا فلا نغتر إن أصبناها ولا نحزن إن فاتتنا واجعل همنا الآخرة واهدنا لما فيه رضاك وخيرنا
💮﷽💮
*﴿إِنَّ اللَّهَ وَمَلَائِكَتَهُ يُصَلُّونَ عَلى النَّبِيِّ يَا أَيُّهَا الَّذِينَ آَمَنُوا صَلُّوا عَلَيْهِ وَسَلِّمُوا تَسْلِيمًا﴾ ﷺ

موعدنا العدد القادم بإذن الله تعالي